كئچدي باهار- ي عؤمروموز | ايزلمه خبرليگي

باخیش

چهارشنبه 22 خرداد 1392

كئچدي باهار- ي عؤمروموز، ايت كوره‌دن كئچن كيمين

گئن كوره‌دن هاساند اوْلار، دار كوره‌دن كئچن كيمين

بئل بوكولوب، قوُلاق باتيب، گؤز ده دوشوبدو چوُققورا

كوند اوْراغيله خسته‌جان، گونده بيچين بيچن كيمين

ديشي دوشن قاري - قوْجا، انگي‌ده توُتمورو غذا

سن‌كي حالين بيلنمه‌سن، ديشلي يئييب، ايچن كيمين

ايپ قيريليب، نه‌جان چيخير، جان ييغيشيب بوْغازينا

داس- ي اجل ده كسميري، دوْغرور دويون آچان كيمين

بال و پرين يوْلوب فلك، يوْخدو توان - ي پروازي

نه دوشورو دوشن كيمي، نه اوُچورو اوُچان كيمين

بير بئله دردلي كيمسه‌نين درديني هاممي آنلاماز

دار ديبينه دوشن بيلر، بندي آچيب، قاچان كيمين

جوخه -‌ي تيره باغلانان، ياخشي قانار تيرين دادين

قلبينه گوللـه‌لر دييب، قيرميزي گول ساچان كيمين

جاميده زهر شوكران، راه - ي نجات باغلانيب

واخت قوُتاريب، چاتيب زامان، مجبور اوْلوب ايچن كيمين

يوك- ياپي باغلا كاروان، اينديجه سسله‌نر جرس

يئيلاقي ترك ائديب كؤچك، ائل اوْبادان كؤچن كيمين

اي كي بوُ نازلي دونيادا، نعمت ايچينده اوينوسان

سئچمه‌يه مايل اوْلما چوْخ، سئچمه‌ليني سئچن كيمين

رحمتليك اوستاد غلامرضا مجدفر

بلاگا گؤره