شوبهه‌سيز اسماعيل جعفرزاده‌نين ايكي جيلدليك سؤزلوگو، ايراندا توركجه‌نين سؤزلوكچولوك آلانينداكي بوشلوغو اؤنملي اؤلچوده دولدوراجاق و سونراكي سؤزلوكلر اوچون دگرلي بير قايناق اولاجاقدير.

اسماعيل جعفرزاده‌نين حاضيريلاديغي، قيساجا "ارك سؤزلوگو" آدي وئريلن "آذربايجان توركجه‌سي سؤزلوگو" تبريزين احرار يايينلاري طرفيندن نشر ائديلدبدير.

ايكي جيلددن اولوشان بو اثرده، 115 ميندن چوخ توركجه آنا سؤزجوك؛ دئييم؛ يئر و شخص آدلاري، سؤزجوكلرين فارسجا و بعضاً اينگيليزجه قارشيليقلاري و بعضي كلمه‌لرين كؤكو ايله ايلگيلي مؤليفين گؤروشلري يئر آلماقدادير.

اسماعيل جعفرزاده كيتابا يازديغي گيريشده، "ديوان لغات‌الترك، سنگلاخ، صحاح‌العجم، اورخون كتيبه‌لري، سومر، دده‌قورقود، تاراما سؤزلوگو و درله‌مه سؤزلوگو"ندن يارارلانديغيني قيد ائدرك، سؤزلوكده ايشله‌ديلن يازي قوراللاري، تورك عرب اليفباسيندا حرفلرين سيرالاماسي، توركجه و يابانجي كلمه‌لرين (عرب-فارس و اورورپا ديل‌لريندن آلينميش كلمه‌لرين) يازيليشي و توركجه‌نين ديل‌بيلگيسل اؤزلليكلري ايله ايلگيلي قيسا بيلگي وئرمكده‌دير.

آرديني اوخو

يازي‌نين آردي‌سيندا بير نئچه شعر امام خميني‌دن و اولارين چئوريلميشينه بيزه قوناق اولون.

قرآن كريمين ترجومه‌سي باشقا ديل‌لره ايكي قانيت و دليله گؤره اولدو. بيري ايچري‌دن ايدي كي قرآن عرب اولمايانلارا تانيتديرما اوجون اصلي قايناق ساييليردي و عرب موسلمانلار عرب اولمايانلارلا ايلگي قوراركن، قرآن چئويرمه‌سيندن‌ده سؤز وار ايدي. ايكينجي‌سي ده ائشيكدن ايدي كي غرب و مسحيت دونياسي قرآن ايله قارشي اولماغا گؤره اونو تانيماق ايسته‌ييب و اونون چئويرمه‌سينه باشلاديلار.

قرآن ترجومه‌لرينين ايچينده توركجه ترجومه‌لري سايي و نئجه‌ليك باخيملاريندان ان اؤنملي ترجومه‌لردن ساييلير. نييه كي بو ديل ايسلامين اوچ ديلين‌دن بيري ساييلير. نئجه كي عثمان طه، قرآن‌نين آدليم يازارلاريندان دئيير، « لفظ، عرب لفظي‌دير، فارس لفظي شكر‌دير . تورك لفظي هنر و صنعت‌دير. » [1] تورك ديل‌لري چين‌ين دوغوسوندان بالكانا قدر چكيليب‌دير كه آذربايجان، آنادولو، تاتار، توركمن، اؤزبك، قيرقيز، قازاق و اويغور توركجه‌لرين اؤز ايچينه آلير. قرآن‌نين توركجه ترجومه‌سي 5-جي قمري قرن‌دن باشلانسادا، لاپ اسكي ترجومه‌لردن بيري اويغور اليفباسي ايله يازديريلان محمدبن‌حمزه اليله‌دير. آنجاق چوخلو توركجه ترجومه‌لر آذربايجان و آنادولو توركجه‌لرينه‌دير. ان اؤنملي آذربايجان توركجه‌سينه اولان ترجومه‌لردن، آغ قويونلو اوزون حسن بويوردوغو ايله 9-جو قمري قرن‌ده ترجومه اولموش‌دور كي ايندي آستان قدس رضوي‌نين كيتابخاناسيندا ساخلانير.