توركجه‌نين، اينجه حالدا آذربايجان توركجه‌سينين، اؤنملي يازيلاري 14-جو ميلادي قرنه قاييدير و بو يازيلار عرب كؤكلو تورك اليفباسي ايله يازيليبلار. ايندييه قدر آلتي يوز ايل‌دن آرتيق بو ديل بو اليفبا ايله يازيليب‌دير. دده قورقود، دلي دومرول و چوخلو بئلنچي سؤيلنجه و افسانه‌لر، قرآن كريم چئويرمه‌لري، برهان الدين، حقيقي (جهانشاهين تخلصي)، حبيبي ديوانلاري 14-جي ميلادي قرن‌دن قاباق و عمادالدين نسيمي 14 و 15-جي ميلادي قرنلرينين ان بؤيوك توركجه شاعيري، قاسم الانوار، فضولي و خطائي (بيرينجي شاه اسماعيل‌ين تخلصي) جنابلاري‌دا توركجه‌نين شاعيرلري ايديلر كي عرب اليفبا ايله يازميشديرلار.

دده قورقود سؤيلنجه‌سي‌ده هم عوثمان توركجه‌سي و هم آذربايجان توركجه‌سينده عرب كؤكلو اليفبا ايله يازيلميش‌دير. 

لاتين و سيريليك اليفبا يالنيز يوز ايلدي اؤز يئريني تورك ديللرينده تابيبلار. آيري باخيشدان 19-جو ميلادي قرنه قدر بو ديل يالنيز عرب اليفبا ايله يازيليردي. حيدر بابايا سلام، شهريارين لاپ اؤنملي يازي‌سيدا بو اليفبا ايله يازيليب‌دير. ايندي ايران‌دا آذربايجان توركجه‌سيندن سونرا قشقايي، خوراسان و توركمن توركلري‌ده بو اليفبا ايله يازيليب، يازيلير و يازيلاجاق‌دير.

ايندي نييه بير نئچه آداملار يالنيز لاتين اليفباني دوزگون گؤروب و عرب اليفباني يالنيش گؤرورلر هله‌ليكده بيزيم قونوموز دئييل و ان‌شاءالله گله‌جكده بونا گؤره چوخلو يازيلاريميز اولاجاق‌دير، آنجاق بونو دئييريك كي عرب اليفبانين ايزلنمي‌سي لاتين اليفباسي ايله دوزگون اولسادا لاتين اليفبانين ايزلنمه‌سي عرب اليفبا ايله داها آرتيق‌دير. اؤز وارليغيميزي اونودماييب و دوزگون باخاق نييه كي هر ايكي اليفبانين اؤزلليكلري وار و اؤز يئرلرينده سايين‌ديرلار، آنجاق بير اليفباني كاميل گؤرمك ياخشي دئييل.