+0 بَينديم

زنجان لاي‌لاي‌لاري (8) / ثريا بخشي



لاي لاي بالام،‌ تار سسي

قاوال سسي،‌ تار سسي

سسين كيمين خوْش اوْلماز

اينان منه تار سسي

***

لاي لاي گولون دسته‌سي

آغاجلارين پوسته‌سي

آنان كيمين اوْلماسين

گؤزون يوْللار خسته‌سي

***

لاي لاي گولون دسته‌سي

بايرام گونون پوسته‌سي

يوخلا سنه اوْخويوم

قاراباغ شيكسته‌سي

***

لاي لاي كهليك فره‌سي

گول‌لو چيچك دره‌سي

بالامين ساوالاندان

گلر بالي،‌ كره‌سي

***

لاي لاي عطير شوشه‌سي

اوره‌ييمين گوشه‌سي

تكجه سنه اوْخشايـير

باهارين بنؤوشه‌سي

***

لاي لاي لالا زمي‌سي

محببتين گمي‌سي

محببت كيميياسي

تئز قـيزيل ائـيلر ميسي

***

لاي لاي يوْللارين باشي

كلئـيبرين داغ- داشي

بوردا بير آت كيشنه‌يير

چاغيرير يار يوْلداشي

***

لاي لاي سهندين داغي

نه گؤزل‌دير اوْيلاغي

آسلان ايگيت بسله‌يير

بالام كيمي، توْرپاغي

***

لاي لاي گول‌لرين آغي

بزه‌يير باخچا،‌ باغي

قـيرميزي‌سي ياناغين

گؤيچك اوزون‌دور آغي

***

لاي لاي گولون بوداغي

گولسون بالام دوْداغي

هر آنايا شـــيرين‌دير

دونـيادا اؤز اوشاغي

***

لاي لاي اوزوم ميلاغي

لاي لاي گولاب بـيلاغي

بورنو فـينديق كيمي‌دير

پوسته بوْيدا قولاغي

***

لاي لاي گوللرين آغي

آچيليبدير يارپاغي

بيردير آنا گؤزونده

كؤرپه قاراسي،‌ آغي

***

لاي لاي سولار باليغي

چؤره‌ييمين قاتـيغي

آتا،‌ آنا سؤزوندن

بالا گلمز آجيغي

***

لاي لاي گؤزوم ايشيغي

ائويمين ياراشيغي

دانـيشاندان اوْلموشام

من ديليوين عاشيغي

***

لاي لاي داغين مارالي

سوروسوندن آرالي

آللاه بوردا گؤرمه‌ييم

بير اوْو سالان يارالي

***

لاي لايـين قملي- ‌ قملي

اوْلماسين بالام قملي

اؤلمه قـيزيلجا ايله

گئده‌سن قالام قملي

***

لاي لاي لالام قورباني

نوْ لور اوْلام قورباني؟

قوزو قوربان بايرامين

من ده بالام قورباني

***

لاي لاي جانـين قورباني

يات لاي لايـين قورباني

سن گئت شيرين يوخويا

اوْلوم جانـين قورباني

***

لاي لاي محببت كاني

لاي لاي ادب مكاني

هاردا محببت اوْلسا

گول‌لندير‌ر تيكاني

***

لاي لايـين توتدوم سني

عجب اوْووتدوم سني

جان قوْيدوم جفا چكديم

بئله بؤيوتدوم سني


قايناق: آذربايجان ائل بيليمي