باخیش
یکشنبه 30 تیر 1392
بؤلوم | تانيتديرما یازار : ائلچي
+0 بَينديم

ايزلمه خبرليگي، دورنا نيوزدان آلديغي راپورا گؤره، پروفسورعلي داشقين؛ يازار،شاعير، چئويرمن، دوزلتمن، توركولوژي وديلچيليك بيليم داللاري اوزره دوكتور،تورك ديلي ادبيات اؤيرتمني ۲۲۰-دَن چوخ بيليمسل و شعر و رومان كيتابلارينين يازاري، چوخ شهرلرده اؤزلليكله اورمودا تورك ديل و ادبيات اوجاقينين تمليني قورموش…دورنانيوز رسانه سينين باشلانيشينان سايين داشقين موعلليم ايله بو ايلك دانيشيغيميز اولور او زامان كي بيز اورمودا هفته ده۲ساعات كيلاسلارا گئتمه يه واختيميز اولموردو،دوكتور منت سيز تاكسي ايله تبريزدن اورمويا قدَر گليب-گئديردي او بويوك امكلره آنجاق بويوك اينسانلار دوزه بيلرلر. دوكتورون ديش پرستيژي نه قدَر ال چاتماز اوجا اولسادا ،عكسينه ايچي او قدَرده آلچاق كونولدي او بويوك اوستادين بير كيچيك اؤيرنجيسي كيمي بونو دويموشامدا سؤيله ييرم.


- سالام و سايغيلار حؤرمتلي موعلليم داشقين جينابلاري! سيزي بير داها اورمودا گوردوكده موتلو اولدوق و يئني بير موصاحيبه ايچون قرار وئرديك واختينيزيدورنانيوز سايتينين اوخوجولاري ايله  پايلاشديغينيز ايچون ساغ اولون!

اؤنجه ليكله سيزه و « دورنانيوز »سايتينين توم كادروسونا درين سايغيلاريمي، سونسوز ساغوللاريمي و گؤنوللو شوكرانلاريمي سونار، هامينيز ايچين اولو تانريدان جان ساغليغي و اولدوغوندان آرتيق باشاريلار ديلريم.

- فارابي ديل اوخولونون تمليني قويماقدان آرتيق ۱۱ ايل كئچدي چئشيدلي تضييق لردن دولايي بو سورج گئرچكدن اوغوردور،بو مركزين ايلك گونلريندن و دواميندان لوطفن دئيين؟

سيزين ده وورغولاديغينيز كيمي، « فارابي ديل اوخولو » تام ۱۱ ايل بوندان اؤنجه آغير شرطلر و بؤيوك سيخينتيلار ايله قارشي- قارشييا اولدوغوموز بير زاماندا قورلموشدور. او دؤنَمين آجي وئريجي گونلري و يوروجو چَتينليك لري اوچ آيريجا قولا بؤلونوردو و اونلارين هر بيريسي اؤزونه اؤزَل اوزلاشما، چاليشما، دؤيوشمه و قانيتلاما ايسته ييردي كي، بيز همين سورونلاري اؤنجه اوجا تانري نين و سونرا دا وارليغيميزا ايچدن اينانان دوستلاريميزين اَل و گؤنول بيرلييي ايله چؤزموش اولدوق. بيرينيجي سورون او دؤنَمين ياسال و اولوسال زوروملوقلولاريندان عبارت ايدي و من هر چاغ اولدوغو كيمي ايشيمي قانون چرچيوه سينده حل ائتمك ايسته ييرديم فقط بونون ايچين چوخ بؤيوك چابا گرَكيردي چونكو كيمسه بئله بير علمي- ادبي- ميللي فعالييتي وار اولان قانونلار سيستئمينده گؤتور- قوي ائده بيلميردي. منيم او گونلر بويونجا باش ووردوغوم ايداره، اورگان، قانون و شخصلرين ساييسي او قدردير كي، هاميسيني بير يئرده خاطيرلايا بيلميرم. بوتون بونلارا باخماياراق، اينانجيمين دوغرو و توتدوغوم يولون دوزگون اولدوغونا تام ووجودوملا اينانديغيم ايچين ييلمادان و اوسانمادان چاليشمالاريمي سوردوردوم و بو گونكو ديل مركزينين ياسال اولاراق قورولماسيني ساغلاديم.

ايكينجي و داحا قورخولو سورون بيزيم جاهيل دوستلاريميزين علمه، ميللي وارليغا و قانوني يوللارا اينانماييب ايچي بوش شوعارلار وئرمه سيندن عبارت ايدي. بونلار بيزيم يانيميزدا دوراجاقلارينا، تام باشاري و گوجلري ايله فارابي اوخولونون قارشيسينا ديكيليب، اونو داغيتماق و اورادا بيليمسَل ائييتيم آلانلاري دالدا- بوجاغا چكيب عؤمورلريني مَحو ائتمك ايچين چالشيرلاردي. بيز بونون ندنلريني چوخ ياخشي بيلير، اونلارين قيسا بير سوره ايچريسينده توكَنيب گئري چكيله جكلريني ده آچيق- آيدين گؤررودوك. اونلار ياراسانين ايشيقدان قورخدوغو كيمي، علمدن قورخار، ميللي ائييتيمدن قاچار و قارشيليقسيز اَمك وئريب ائله- يوردا خيدمت ائدن بيريني دوشمن كيمي گؤسترمه يه چالشيرلاردي. چونكو اونلارين بازاري بيليم دئييل ده، جهالت كؤلگه سينده رؤونق تاپيردي.

اوچونجو سورون ايسه بينا و يئر سورونويدو. اورمو كيمي بؤيوك شهرده كيمسه بير اوتاقليق بئله يئريني هم ده پارا قارشيليغيندا بيزه وئرمك ايسته مز، توتودوغوموز ياسال يولو قورخولو بير گئديشات كيمي دوشونوب دوروردو. بونو بيله- بيله، بيز يئنه ده اومودوموزو زييانيميزين تاواسيندا بيشيريب يئمكدنسه، داحا آرتيق چابالاماغي و يولوموزون دوغرو اولدوغونو هر كس ايچين آچيقلاماغي دوشوندوك و ترجيح ائتديك. همين يؤنده چوخ دَيَرلي اؤيرَنجي لريمدن بيري ساييلان « رسول اَرتورك » ون يارديمي ايله جناب « حاج آغا ذولفقاري » و جناب « حاج آغا صادقي » ايله تانيشديم. اونلار ايلك اؤنجه بير اوتاق و محدود بير ساعاتلار ايچين بيزي قبول ائتديلر و داحا سونرا بيزي و قانوني يولوموزو اؤيرَنينجه « فارابي » اوخولونو تام كادرو و بوتون امكانلاري ايله بيزه اَسرگه مه ديلر. بئله ليكله بيزيم اوچونجو آشاماميز دا اوغورلو باشا چاتدي و جهالت كاروانيني اؤلومجول اولاراق سوروندورَن سيياست دوشكونو و ايچي بوش شوعار پهلوانلاري يعني بيزيم اوزده دوست، آرخادا قنيم لريميز قارا بولود اولاراق باشيميزدان چكيليب گئتديلر. بورادا بير چوخ اورمولو دوستلاريمين آديني چكيب تشككور ائتمم لازيم دير فقط ساييلاري نين چوخ اولدوغو اوزوندن آغ ساققال اولاراق جناب « حاج آغا ذولفقاري » نين آديني چكيب اؤز درين ميننت دارليغي بيلديرمك ايسترديم.

- بـئله بير ديـل اوخولـلاري باشقا شهرلـرده اوزلـليكله تبـريزده ده وار مي؟

 بيلدييينيز كيمي ايراندا ايلك تورك ديلي و ادبياتي اوخوللاريني ياسال و رسمي اولاراق قوروب و داواملي شكيلده چاليشديران من اولدوغوم ايچين، بئله بير اوخولون هئچ بير شهرده حتتا مؤحتشم تبريز شهرينده بئله قورولماديغيني بيليرم. اؤتن اوتوز نئچه ايلين ايچريسينده آيري- آيري بيليم اوجاقلاريندا گئچيجي اولاراق ديل صينيفلاري قورولموشدور يانليز اونلارين حاميسي بير- ايكي آيليق و قيسا بير سوره ايچين هم ده رسمي اولماياراق نظرده توتولموشدور. من همين گئچيجي صينيفلارين بير چوخوندا اؤيرتمن اولاراق اَمك وئرميش بيريم و بو گونده همين صينيفلار بعضي شهرلر او بؤلومدن تبريزده داوام ائدير آنجاق  فارابي ديل اوخولو گئچن ۱۱ ايلين بويونجا دورمادان فعاليت گؤستر ميش و يوزلرجه سويداشيميزي او بؤلومدن سيزين اؤزونوزو اؤز آنا ديلي، ادبياتي و ميللي- معنوي دَيَرلري ايله تانيش ائديب، اوخوسونو تام بيتيرنلر ايچين ديپلوم بئله وئرميش دير.

- سون ايلـلرده بيـليم سل و ادبي چابالارينيزدان سويله يين : 

منيم بو گونه دك اؤلكه ايچي و اؤلكه ديشيندا ۲۲۱ كيتابيم ايشيق اوزو گؤرموشدور كي، اونلاردان ۱۲ سون ايللره عاييددير و بئش جيلدليك ( ۲۵۰۰ ص. ) شعيرلر توپلوسو، توركجه- فارسجا گئنئل سؤزلوك، علي آغا واحيدين ۹۴۴ صحيفه ليك ديواني،… سون ايللرين وئريمي دير. بوندان باشقا، سون ايللرده قاتيلديغيم اولوسلارآراسي قورولتايلاردا دا بيرينجي و ايكينيجي يئرلري قازاناراق تورك دونياسي آوروپا- آسيا ادبي اؤدوللريني دا اَلده ائديب ائليميزين ادبي وارليغينا سونموشام. بونلارين ياني سيرا اؤتن ايللر ايچيريسينده اييرميدن چوخ شارقي و ماهنيم اؤلكه ايچي و اؤلكه ديشيندا بسته لَنيب اوخونموشدور.

- گـله جكـده نه ايشـلر و اثرلـري گوزله يه  بيـلريـك ؟

گؤرَجك گونوم و سورَجك عؤمروم اولورسا، آذربايجان توپونيملري (۱۲۰۰ ص.)، بؤيوك نيظامي نين خمسه سي (ترجومه)، قاراباغ پوئماسي، اورمودا گؤزوم قاليب ( رومان)، من حله ده سئويرم ( رومان)، اؤز گئچميش (خاطيره)، … كيمي اثرلري نشر ائتديرمه يي دوشونورم.

-شاعر اؤره گي دردلي اولار؛ اورمو گؤلونون دالغالاري سيزين اؤره يينيزده و شعرلرينيزده نه طور چالير؟

« سئوگي داموسو » رومانيمدا قلمه آلديغيم، « اورمولو اؤيرَنجي لريمه » آدلي شعيريم و اورمو ايله باغلي بير چوخ يازيلاريمدا چالديغي كيمي.

-سيز هميده بير زامانلار آسان درگي سينين باش يازاريدا اولدونوز؛عموميتده آذربايجان غزئته لرينين  سورونلاريني  و اولورسا صاباحيميز درگي سيني دَيرلنديرين!

  « آسان » قزئته سي و بير چوخ باشقا داخيلي- خاريجي مطبوعات اورگانلاري نين باش يازاري، سوروملو مودور و يئتكيلي نوماينده سي اولدوغوم ايچين بو ايشين نئجه زور، نئجه سوروملو و نئجه آغير اولدوغونو هركسدن داحا ياخشي بيليرم. بيزيم كيمي اؤلكه لرده دوشونجه ني تانري نين آند ايچدييي قلم ايله چاتديرماق، تَلَسكن اوخوجو كوتله سيني راضي سالماق، گَلير اَلده ائتمه دن مطبوعات ايشي گؤرمك و سونوچدا ايستمه دييين ائلئشتيريلري آلماق هر كسين ايشي دئييل دير. بو باخيمدان سيزين و ديگر دوغرو دوزگون چاليشان مطبوعات ايشچيلريني تبريك ائدير، توتدوغونوز يولدا اوغورلار ديله ييرم.

- ايسترديم سون شعرينيزي رجاء ائديم : 

گؤزلرينده توتساق ياتان

مني گؤرمه يه قويو وئر

كيپريك بارماقليقلاري نين آرخاسيندان اولسا بئله

يوخسا گؤروش ياساغيمي وار؟

دوداقلاري نين چئليك قاپيسيندا

كئشيك دوران قاردييانا تاپشير مني

يوخسا اونون دا

بوغازا تاخيلاجاق ايپي، ساپي، آساغيمي وار؟!

سن

گؤزونده جيويل- جيويل يانان گونشي سؤندورمه

من

گؤز ياشلاري نين ايسسيز، قير چؤلونده

سوسومدان اؤلمه يي باشارار

باخيشيندا ديريليب

يئني من اولماغي ده نه يَرَم

بير اَلجه اوره يي بوشونا دؤيوندورمه!

حارايا گئتديييني بيلمه ين

اوچورتما دئييل آغزيمدان چيخان سؤز

سن منيم باشيما گَلَن اَن ايي شئي

من سنين باشينا دوشن اَن گؤزَل بلا

اييده باغيندا گؤزله يه جم

گَل  حا !

منده بير سن

سنده بير منيم اَسير دوشوب

بو آرادا

سنه گئدن هئچ بير يول منه اوزاق دئييل

باش اوجوندا دورسان اييي اولور

بو قازان قايناداجاق بيزي حله

سندكي منين دئييل

اولسا- اولسا

اونداكي كيمين چيي اولور!

اَن اييسي

عؤمورلوك ايش كسدير توتوقلو منه

گؤروشسوز، گؤروجوسوز ياتسين بَبَكلري نين بيرينده

من گَلير آليريم سني

گؤي مچيدين ميناره سيندن

سن دايان، دور يئرينده!…

- ساغ اولون ؛هر نه اؤره ك سوزونوز وارسا  بويورون؟ 

كئشگه دئيه بيلسه يديم قيفيللي قولاقلارا آچارسيز اوره ييمين

 سؤزلريني، كئشگه !!


دانيشيق آپاران : حجت الهامي

قايناق:  دورنا نيوز