شوبهه‌سيز اسماعيل جعفرزاده‌نين ايكي جيلدليك سؤزلوگو، ايراندا توركجه‌نين سؤزلوكچولوك آلانينداكي بوشلوغو اؤنملي اؤلچوده دولدوراجاق و سونراكي سؤزلوكلر اوچون دگرلي بير قايناق اولاجاقدير.
اسماعيل جعفرزاده‌نين حاضيريلاديغي، قيساجا "ارك سؤزلوگو" آدي وئريلن "آذربايجان توركجه‌سي سؤزلوگو" تبريزين احرار يايينلاري طرفيندن نشر ائديلدبدير.
ايكي جيلددن اولوشان بو اثرده، 115 ميندن چوخ توركجه آنا سؤزجوك؛ دئييم؛ يئر و شخص آدلاري، سؤزجوكلرين فارسجا و بعضاً اينگيليزجه قارشيليقلاري و بعضي كلمه‌لرين كؤكو ايله ايلگيلي مؤليفين گؤروشلري يئر آلماقدادير.
اسماعيل جعفرزاده كيتابا يازديغي گيريشده، "ديوان لغات‌الترك، سنگلاخ، صحاح‌العجم، اورخون كتيبه‌لري، سومر، دده‌قورقود، تاراما سؤزلوگو و درله‌مه سؤزلوگو"ندن يارارلانديغيني قيد ائدرك، سؤزلوكده ايشله‌ديلن يازي قوراللاري، تورك عرب اليفباسيندا حرفلرين سيرالاماسي، توركجه و يابانجي كلمه‌لرين (عرب-فارس و اورورپا ديل‌لريندن آلينميش كلمه‌لرين) يازيليشي و توركجه‌نين ديل‌بيلگيسل اؤزلليكلري ايله ايلگيلي قيسا بيلگي وئرمكده‌دير.
ارك سؤزلوگون اؤن صحيفه‌سي
كيتابين 33-جو صحيفه‌سينده‌كي بيلگيلردن، موليفين 1336-جي ايلينده خوي شهري‌نين قره‌ضياالدين ماحاليندا آنادان اولدوغونو، سولاما و آغاجلاما بؤلوموندن ليسانس و عيني بؤلومدن يوكسك ليسانس ديپلوماسي ايله مأذون اولدوغونو، ايش حياتي ايله بيرليكده "روشهاي كنترل رسوب" و "كاربرد كامپيوتر در مهندسي رودخانه" آدلي كيتابلاري يايينلاديغيني اؤيرنيريك.
اسماعيل جعفرزاده كيتابين 31-جي صحيفه‌سينده وئرديگي قايناقلار قيسميندا، يايقين و استاندارد قايناق گؤسترمه يؤنتميندن فرقلي اولاراق، اؤنجه آد و داها سونرا سوي‌آدي وئرميش؛ بعضي موليفلرين آديني، بعضي اثرلرين يايين‌ائوي و يايين تاريخيني يازماغي اونوتموشدور.
چوخ دقتله و اوزون بير چابا سونوجوندا حاضيرلانان بو سؤزلوك، داها اؤنجه يايينلانميش اولان سؤزلوكلرله مقايسه‌ده داها چوخ سؤزجوك ايچرمكله بيرليكده، تورك ديلي‌نين گئنيش بير آلانيني احاطه ائتمكده و دوغو توركجه‌سيندن باتي توركجه‌سينه قدر، يعني چاغاتاي تورك يازي ديلي، آذربايجان توركجه‌سي و آنادولو توركجه‌سينه عايد كلمه‌لري احتيوا ائتمكده‌دير. بو آچيدان باخيلديغيندا كيتابين آدي‌نين "آذربايجان توركجه‌سي سؤزلوگو" دئييل، "توركجه سؤزلوك" اولسايدي داها قاپساييجي و داها اويغون اولابيلردي.
شوبهه‌سيز اسماعيل جعفرزاده‌نين ايكي جيلدليك سؤزلوگو، ايراندا توركجه‌نين سؤزلوكچولوك آلانينداكي بوشلوغو اؤنملي اؤلچوده دولدوراجاق و سونراكي سؤزلوكلر اوچون دگرلي بير قايناق اولاجاقدير.
ارك سؤزلوگون سون صحيفه‌سي
كيتابين اؤزلليكلري:
- 115 ميندن آرتيق آنا سؤزجوك، دئييم؛ يئر و شخص آدلاري
- بوتون سؤزجوكلرين توركجه آنلامي و 80 سؤزجكون فارسجا و اينگيليسجه قارشيليقلاري
- 1500 دن آرتيق بيتكيلرين توركجه آدي، بيليمسل قارشيلاري ايله و آچيقلانديرماسي
- 1200 دن آرتيق حئيوانلارين توركجه آدلاري، بيلمسل قارشيلاري ايله و آچيقلانديرماسي
- 15000 دن آرتيق قيز و اوغلان گؤزل آدلاري آنلاملاري ايله
- 13000 دن آرتيق توركجه شهر و كندلرين آدلاري آذربايجان، خوراسان، گولوستان و ايران‌نين اورتا و گونئينده يئرلشن تورك يئرلري
- 5000 دن آرتيق داغلار (يئر، اوجاليق) و چايلار (اوزونلوق، ياماج، آخيش) آدي
- دوزگون تلفظلر، توپلومسال بيلگيلر و ائتيمولوژيك آچيقلانديرما
- 1000 دن آرتيق تورك حكومتلر، بيليمجيلر، شاعيرلر و بؤيوك آداملارا گؤره قيساجا بيلگيلر
- سؤزجوكلرين چوخونا ائتيمولوژيك ايشلر
- اينديكي و سومر توركجه سؤزجوكلرين توتوشدورماسي
- اينديكي و اورخون يازيتلار توركجه سؤزجوكلرين توتوشدورماسي
- اينديكي و ديوان لغات الترك سؤزجوكلرين توتوشدورماسي
- اينديكي و صحاح المعجم سؤزجوكلرين توتوشدورماسي
- اينديكي و سنگلاح سؤزجوكلرين توتوشدورماسي
- فارسجا و اينگيليسجه‌دن آلينميش سؤزجوكلرين آراشديرماسي
- تلفظلرين دوزگونون لاتين اليفبا ايله يازيلماسي اؤزلليكله اؤزل آدلار اوچون
آلماق:
يورد سايتيندان بو 28 مين تومن‌ليك سؤزلوگو آلا بيلرسينيز. هم‌ده بو كيتابي اؤز شهرينيزين آدليم كيتاب ساتانلاريندان آلا بيلرسينيز.
اؤنر: منجه بو كيتابين دگري واردير كي آلينسين، هم توركجه يازارلارا بير كؤمك،هم‌ده بير توركجه سؤزلوك يوخ بلكه بير بيليكليگين يئرين ائوينيزده بوش اولماماغيني گؤستره‌جكدير.
چئوريم ايچي:
بو سؤزلوگون چئوريم ايچي دورومون بوردان گؤره بيلرسينيز.
انديرمه*:
بو فايلين بيرينجي نوسخه‌سيني بوردان انديرينيز. (بويوت: 12 مئقابايت، 1338 صحيفه‌ده 70000 دن آرتيق سؤزجوگو ايچينه آلان)
*: بيرينجي نوسخه‌سيني انديرمه اوچون قويولوبدور.
